 |
 |
 |
 |
 |
Crosara dee Cave, ani '40
Da sempre, nei paesi come oggi dì, dove nasse un campanie sona sempre mèzodì e soto eà sò ombra xè créssuo i dè più, vivendo i mejo momenti deła propria zòventù.
Ałora, più ché adesso, ae Cave el campanie mancava, ma in conpenso gavevimo eà crosara dove par nojaltri, boce de ałora, el jera el ritrovo, el passaténpo de un'ora.
Par zugare a Cesanova, soto el campanie, come i re Magi partivino da lontan e dopo eà Messa o Dotrina e cantà e litanie, Don Silvestri nè dava anca un tòco de pan.
Se eà mòcoła jera tanta, tornavimo in fiła ma ogni tanto ea né 'ndava sbusa, parchè drio eà inferiada, co n'ocio sol saco de pan e staltro so chi e man slongava, ea te zsigava: Va via! parché te gaveva scoperto Madre Pia.
No sè sentivimo a casa nostra ma, come tanti forestieri al'estero, nessuno te vardava, nessuno te fiłava, el soriso te tornava ritrovandose in crosara.
Par posto te gavevi l'unico nome in dotassion "STRADA DEE CAVE"
cò fantasia ghemo ciamà quee pà e parte, 'na strada del canałe e staltra che portava a Campo de Marte.
E nostre mame trovava de tuto, i bazar nò mancava, ea Lucia massareta, ea Vitoria dei fruti, Sali e Tabacchi da eła Siora Nana, mentre i nostri pari e tuti i tosi adulti, i podeva far fanèła dal barbiere o da Pacagnea.
Se rivava in crosara da ea riviera e dałe stradee fasendo bossoło se programava zùghi e anca e marche. Nò gavevimo "La Sala Giochi", se zugava all'aperto: cécoła, cuco, bandiera, pìndoło, mago e ea corsa col sercio.
Quando se sudava e ea sen nè pressava, el rubineto deła Sidonia ne disetava, suo ea gaveva fato quel "dito" tanto beo, dar da bevare ai assetati, come xé scrito nel Vangeło.
Prima che ae Cave rivasse ea cultura, no gavevimo e Vie, ma bensì e Stradee, chè seguendo ła leje de madre natura, col nome dełe fameje e vegneva ciàmae.
Queła de Boesso, uncò Via Agnesi, queła de Bepi Cica, uncò Via Tazzoli, queła del bècaro, uncò Via Gioia, queła de Bergantin uncò Via Nobili.
Queła deła Gioconda, uncò Via Brocchi, ea carezà deła vecia furba, uncò Via Guglielmotti, ła carezà dè Marsari, uncò Via Ferracina, queła deła Ema dei ciuci, uncò Via Lioy.
Queła de Gaina, uncò Via Lorenzoni, queła de Garon uncò, Via Fondelli, queła dei Magri e dei Galiassi, uncò Via Plana, queła dea gabina uncò ingresso Ist. S.Benedetto da Norcia.
Queła deła pompa, uncò Via Pioveghetto, queła de Bertinassi, uncò Via Pasteur, queła de Signorini, uncò Via Jenner, queła de Baełasso, uncò Via Malpighi.
Queła de Capon uncò Via Stoppani; queste xé e Vie che nel corso de tanti ani gà fato ea storia tanto singołare che difizilmente el còrare del tempo podarà far desmentegare.
Quele che manca dal'elenco aelora nò e ghé jera, perciò nò e fa parte de queła vecia era. Ałora ea campagna scumissiava de quà deła ferovia, dove adesso xé ciamà imediata periferia.
Se lavorava in proprio, se sè dava da fare cò tanta fantasia; tuti i passàji i vegneva tratai al MERCATO NERO, l'imponibie no esisteva parchè tuto jera in nero.
El giro pà ea campagna jera preferìo da chi amava l'ecołogia. Gaine, saładi e ovi, baratando, se portava via. Ghè pensava l'Uficio Export, improvisà in crocevia a vendare tuto al personałe viajante chè rìvàva da ea ferovia.
I camion rałentava rivando in crosara, dove 'na pergoeła de edera un'angoeło ea ornava. Eła serviva par scondarse e 'ndare al'assalto dei camion inglesi cò un atletico balzo.
Montai sù se butava xò ogni ben de Dio, che dopo doveva dividere Ivo, Idone e Rosso Servadio. Spesso rancurava anca el primo che passava, cussì a quei che smontava gnènte ghe restava.
Ae Cave ghe jera tanti poaréti in cana, ma gà sempre girà tanta grana, tanto xé vero che da Venessia se gà copià e un distacamento del Casinò se gà piantà.
Zugo unico par tuti "BISCA" cò tre carte in tera: piena, meza, ma anca sbusa se ła fortuna jera nera. Come se sfojava el masso e ea carta compariva, ghe jera chi godeva e chi imprecava a la sfiga.
Pur nò avendo pagà e tasse sò i utiłi de ałora nessun se gà arichio, nè fato ea seconda dimora. Cò 'na man se ciapava e cò staltra se spendeva. E l'INDOMANI?. Se spetava cò fiducia queło che vegneva.
Ea crosara dełe Cave nò xé più queła; sensi unici, STOP, parchejo permanente e cussì via. Semo deventà 'nà società de omani a posto, ma pà i nostri boce, in crosara, nò ghè xé più posto.
Pà contarve stì ricordi nò me gò strucà i sarvei, ghe xé altri ae Cave che ghe nè pol contare anca de più bei e adesso che gò finio me sento stanco, pal boetin del prossimo Nadae se fassa vanti 'naltro
Dolfo Tasca